ஓசைகளுக்குள் படிந்திருக்கும் இந்தச் சொற்கள்
எதிர் பார்க்கவேயில்லை
இவ்வளவு விரைவில் உணரும்
தருணம் வாய்த்திருக்கிறது
வெண்முடிகோதும் ஆணவத்திற்கு
விட்ட குறையொன்று
எந்தப் புள்ளியிலிருந்தோ
வேறெங்கிருந்தோ
தொடங்கியிருக்கிறது
முதல் உதிர்வுச் சோதனையை
மறந்த முகங்களைத் தேடும்
அவசரங்களுக்குள்
பரபரப்பாகியிருக்கும் வேளையில்
பாதுகாகக்கப்பட்ட
அரசவைச்சுவர்களிலிருந்து
சின்னஞ் சிறிய கற்கள்
வீழ்ந்து விடத் தொடங்கினாலும்
அதன் ஓசைகளுக்குள்
இந்தச் சொற்கள் படிந்திருப்பதை
மறுக்க வாய்ப்புகளில்லை
தெருவோரக் காட்சிகளில் விழாது
நிழலைக் கூட பத்திரப் படுத்தியிருக்கும்
குளிர் சாதன பதவிகளுக்குள்
ஓய்வுகளிலிருந்தாலும்
ஆதிக்கம் கொள்ளும் வெய்யிலின் வலைகளுக்குள்
ஏந்திக் காத்திருக்கும்
அந்த வர்ணங்களின் முகங்களில்
வழிந்து விடாதா ஈரம்
No comments:
Post a Comment